الحمد لله رب العالمين، والعاقبة للمتقين، والصلاة والسلام على عبده ورسوله وأمينه على وحيه وخليله وصفوته من عباده نبينا وإمامنا وسيدنا محمد بن عبدالله، وعلى آله وأصحابه، ومن سلك سبيله، واهتدى بهداه إلى يوم الدين. أما بعد:   أما بعد، فاعوذ بالله السميع العليم من الشيطان الرجيم، بسم الله الرحمن الرحيم، قال الله تعالى، وَلِكُلِّ أُمَّةٍ جَعَلْنَا مَنْسَكًا لِيَذْكُرُوا اسْمَ اللَّهِ عَلَى مَا رَزَقَهُمْ مِنْ بَهِيمَةِ الْأَنْعَامِ ۗ فَإِلَهُكُمْ إِلَهٌ وَاحِدٌ فَلَهُ أَسْلِمُوا ۗ وَبَشِّرِالْمُخْبِتِينَ(الحج:34)، وقال: اِنَّـآ اَعْطَيْنَاكَ الْكَوْثَرَ،فَصَلِّ لِرَبِّكَ وَانْحَرْ،

اِنَّ شَانِئَكَ هُوَ الْاَبْتَـرُ(الكوثر)، صدق الله العظيم. وعَنْ عَائِشَةَ أَنَّ النَّبِيَّ صَلَّى اللَّهُ عَلَيْهِ وَسَلَّمَ قَالَ، "مَا عَمِلَ ابْنُ آدَمَ يَوْمَ النَّحْرِ عَمَلًا أَحَبَّ إِلَى اللَّهِ عَزَّ وَجَلَّ مِنْ هِرَاقَةِ دَمٍ وَإِنَّهُ لَيَأْتِي يَوْمَ الْقِيَامَةِ بِقُرُونِهَا وَأَظْلَافِهَا وَأَشْعَارِهَا وَإِنَّ الدَّمَ لَيَقَعُ مِنْ اللَّهِ عَزَّ وَجَلَّ بِمَكَانٍ قَبْلَ أَنْ يَقَعَ عَلَى الْأَرْضِ فَطِيبُوا بِهَا نَفْسًا”(ابن ماجه والترمذي).

                   ●قربانی کیا ہے؟●

عید الاضحی کی نماز کے بعد پہلے دن یا قربانی کے دیگر ایام میں مقررہ جانوروں میں سے کسی کو اللہ کا قرب حاصل کرنے کے لیے ذبح کرنے کو قربانی کہتے ہیں یہ اس اولوالعزم پیغمبر کی یادگار ہے جس نے ہزاروں سال قبل فرمابرداری اور جذبہ ایثار و قربانی کی ایسی مثال پیش کی جو اللہ کو اتنی پسند آئی کہ قیامت تک کے لئے یادگار بنا دیا چنانچہ ہر سال ماہ ذی الحجہ کی دس تاریخ کو نماز عید کی ادائیگی کے بعد ہر صاحب استطاعت مسلمان اسی عظیم پیغمبر کی عظیم سنت کو نبھاتے ہوئے اپنی حیثیت کے مطابق اللہ کی راہ میں جانور قربان کر کے اپنے مالک کو راضی کرنے کی کوشش تو کرتا ہی ہے ساتھ ہی دنیا کو یہ پیغام دیتا ہے کہ ایک مسلمان اور بندے مومن اپنے مالک کو خوش کرنے کے لئے دنیا کی ہر بڑی سے بڑی نعمت بھی قربان کر سکتا ہے۔

                  ●قربانی کی ابتدا●

قربانی کا آغاز ابتدائے آفرینش سے ہی ہوگیا تھا جب آدم علیہ السلام کے دو بیٹیوں نے اپنے ایک مسئلے کو لیکر اللہ کےلئے اپنی قربانیاں پیش کیں جس کا واقعہ یوں ہے، چونکہ اس وقت دنیا کی ابتدائی حالت تھی ، اس لئے یوں ہوتا تھا کہ حضرت آدم کے ہاں ایک حمل سے لڑکی لڑکا دو ہوتے تھے ، پھر دوسرے حمل میں بھی اسی طرح تو اس حمل کا لڑکا اور دوسرے حمل کی لڑکی ان دونوں کا نکاح کرا دیا جاتا تھا ، ہابیل کی بہن تو خوبصورت نہ تھی اور قابیل کی بہن خوبصورت تھی تو قابیل نے چاہا کہ اپنی ہی بہن سے اپنا نکاح کر لے ، حضرت آدم اس سے منع کیا آخر یہ فیصلہ ہوا کہ تم دونوں اللہ کے نام پر کچھ نکالو ، جس کی خیرات قبول ہو جائے اس کا نکاح اس کے ساتھ کر دیا جائے گا۔ اب ہابیل نے ایک خوبصورت موٹا تازہ مینڈھا اللہ کے نام پر ذبح کیا اور بڑے بھائی نے اپنی کھیتی کا حصہ اللہ کیلئے نکالا۔ آگ آئی اور ہابیل کی نذر تو جلا گئی ، جو اس زمانہ میں قبولیت کی علامت تھی اور قابیل کی نذر قبول نہ ہوئی ، اس کی کھیتی یونہی رہ گئی ، اس نے اس میں سے اچھی اچھی بالیں توڑ کر کھا لیں تھیں۔ جس کی قربانی قبول نہیں ہوئی اپنے بھائی سے کہنے لگا میں تجھے ضرور قتل کروں گا۔ بھائی نے جواب دیا کہ اللہ تعالیٰ تو متقی لوگوں کی قربانی قبول فرماتا ہے ،تم میں تقویٰ نہیں ہے۔ اس لئے تمہاری قربانی قبول نہیں ہوئی اس میں میرا کیا قصور ہے۔بالآخر اس نے اپنے بھائی کو قتل کیا، پھر اپنے اس فعل پر بہت نادم ہوا اور افسوس کیا (المائدہ:27)۔ قاتل کا نام قابیل تھا مقتول کا نام ہابیل تھا۔قابیل پہلا شخص ہےجس نے بنی آدم میں قتل کو جار ی کیا۔ (بخاری)۔ آدم علیہ السلام اس قتل پر بہت روئے اور افسوس کیا۔

اِس واقعہ سے یہ بات واضح ہوگئی کہ قربانی کا عبادت ہونا حضرت آدَم علیہ السلام کے زمانے سے ہے اور اس کی حقیقت تقریباً ہرملت میں رہی، البتہ اس کو خاص شان و شوکت رفعت و عظمت  اور بلندی و پہچان حضرت اِبراہیم و حضرت اِسماعیل علیہما السلام کے واقعہ سے حاصل ہوئی، جس کی تفصیل سورہ الصافات میں مذکور ہے۔ 

          ●ابراہیم علیہ السلام کا واقعہ● 

        حضرت ابراہیم علیہ السلام نے خواب میں دیکھا کہ وہ اپنے بیٹے اسماعیل علیہ السلام کو ذبح کررہے ہیں۔ یہ صرف ایک خواب نہیں بلکہ آزمائش تھی کیونکہ  نبیوں  کا خواب سچا ہوا کرتا ہے، چنانچہ اللہ تعالیٰ کے اس حکم کی تعمیل کے لئے حضرت ابراہیم علیہ السلام   نے اپنے بیٹے اسماعیل علیہ السلام سے پوچھا  کہ اللہ تعالیٰ نے مجھے تمہیں ذبح کرنے کا حکم دیا ہے تم کیا کہتے ہو؟ فرمانبردار بیٹے اسماعیل علیہ السلام نے جواب دیا  : ابا جان! جو کچھ آپ کو حکم دیا جارہا ہے، اسے کرڈالئے۔ ان شاء اللہ آپ مجھے صبر کرنے والوں میں پائیں گے۔ (سورۂ الصٰفٰت:102)بیٹے کے اس جواب کے بعد حضرت ابراہیم علیہ السلام اپنے بیٹے حضرت اسماعیل علیہ السلام کو ذبح کرنے کے لئے  جب مکہ مکرمہ سے لے کر چلے تو شیطان نے منیٰ میں تین جگہوں پر انہیں بہکانے کی کوشش کی، جس پر انہوں نے سات سات کنکریاں اس کو ماریں جس کی وجہ سے وہ زمین میں دھنس گیا ۔ آخرکار خوشنودی رب کی خاطر حضرت ابراہیم علیہ السلام نے اپنے دل کے ٹکڑے کو منہ کے بل زمین پر لٹادیا، چھری تیز کی، آنکھو ں پر پٹی باندھی اور اُس وقت تک چھری اپنے بیٹے کے گلے پر چلاتے رہے یہاں  تک اللہ تعالیٰ کی طرف سے یہ صدا  آگئی۔ اے ابراہیم! تو نے خواب سچ کر دکھایا، ہم نیک لوگوں کو ایسا ہی بدلہ دیتے ہیں۔ (سورۂ الصٰفٰت104۔105) چنانچہ حضرت اسماعیل علیہ السلام کی جگہ جنت سے ایک مینڈھا بھیج دیا گیا جسے حضرت ابراہیم علیہ السلام نے ذبح کردیا۔ (سورۂ الصٰفٰت 107) اس واقعہ کے بعد سے اللہ تعالیٰ کی رضا کے لئے جانوروں کی قربانی کرنا خاص عبادت میں شمار ہوگیا۔ چنانچہ حضور اکرم صلی اللہ علیہ وسلم  کی امت کے لئے بھی ہر سال قربانی نہ صرف مشروع کی گئی، بلکہ اس کو اسلامی شعار بنایا گیا اور حضرت ابراہیم علیہ السلام کی اتباع میں حضور اکرم صلی اللہ علیہ وسلم  کے طریقہ پر جانوروں کی قربانی کا یہ سلسلہ کل قیامت تک جاری رہے گاان شاء اللہ ۔

               ●ہر امت میں قربانی ●